Апама этек кир тууралуу кантип айтып берем?
Интро
Салам, курбум! Көпчүлүк өспүрүм кыздарды тынчсыздандырган тема тууралуу сүйлөшөлү – бул биринчи этек кир тууралуу ата-энеге (апасына) айтуу керекпи деген маселе. Бул көпчүлүк үчүн татаал жана жагымсыз учурдай сезилет, бирок чынында ал маанилүү жана сен ойлогондон кыйла жеңил болушу мүмкүн. Баштадык!
Этек кир деген эмне?
Алгач маалымат бере кетели. Этек кир же менструация – бул ай сайын жыныс кынынан аз өлчөмдө кан агуу. Бул кыздын организминдеги табигый процесс, ал келечекте эне болуу мүмкүнчүлүгү менен байланыштуу.
Эстен чыгарба — этек кириң башталганда, бул сенин организмиң талаптагыдай өнүгүп жатат дегенди билдирет.
Ата-энеге айтуу керекпи: ооба же жок?
Кел эми негизги маселеге өтөтү: биринчи этек кир тууралуу ата-энеге айтуу керекпи? Жооп жөнөкөй – ооба, айтыш керек. Сен кайрыла турган биринчи адам апаң болот, анткени апаң мындай иштерде жеке тажрыйбасын бөлүшүп, сени бардык жагдайда колдоого даяр болгон, жашооңдогу эң жакын жана ишенимдүү адам.
Эми эмне үчүн биринчи этек кир тууралуу жакын адамдарга айтуу керектиги тууралуу жыйынтык чыгаралы:
Колдоо жана түшүнүү
Ата-эне этек кир келгенде моралдык колдоо көрсөтө алышат. Алар жашоонун бул жаңы мезгилинде сени жалгыз калтырбай, тынчсыздануудан арылууга жардам берет. Чоңдордун колдоп жатканын билүү ушул мезгилде сага ишенимдүү болууга жардам берет.
Жакындык жана ишеним
Ата-эне көбүнчө эң жакын жана ишенимдүү адамдар болуп саналат. Жакындарыңыз менен баарлашуу силердин ортоңордо жакын жана ишенимдүү мамилени жаратат. Бул этек кир маселелеринде өзүңдү ыңгайлуу жана ишенимдүү сезүүгө мүмкүндүк берет.
Кызыктырган суроолорду берүү мүмкүнчүлүгү
Апаң же улуу эжең этек кир жана аялдардын ден соолугу тууралуу суроолорго жооп бере алышат. Бул сенин денеңе эмне болуп жатканын жакшы түшүнүүгө жардам берет. Жакындарыңдан алган билим жана маалымат процессти анча коркунучтуу эмес жана түшүнүктүү кылат.
Практикалык жардам
Ата-энең гигиена каражаттарын: төшөмөлөрдү жана тампондорду тандоодо жана пайдаланууда сага жардам бере алышат. Алар жеке гигиена каражаттарын кантип колдонууну түшүндүрүп берет, үйрөтүшөт жана этек кирге даярданууга жардам беришет.
Этек кир жөнүндө кантип туура сүйлөшүү керек?
Бул ыңгайсыз талкуу сыяктуу сезилиши мүмкүн, бирок чындыгында андай эмес. Этек кир табигый процесс экенин унутпа. Сүйлөшүүнү «Апа, менин этек кирим башталды» деп айтуу менен баштасаң болот. Эгерде бир аз тынчсызданып жатсаң, эмнени жана кантип айтууну алдын ала ойлонуп алгын. Сүйлөшүү үчүн ылайыктуу убакытты тандоо да маанилүү, анткени көбүнчө апаң үй жумуштары менен алек болот же жумушта болот. Апаң бош болгон убакытты танда, ал сага толук көңүл бура алгыдай болсун, анткени бул интимдик сүйлөшүү болот. Силерге тоскоол болбогондой жалгыз калганыңар жакшы. Эгерде түздөн-түз сүйлөшүү мүмкүн болбосо жана сен дагы эле коркуп жатсаң, мессенджерде жазуу же билдирүү жакшы альтернатива болушу мүмкүн. Көбүнчө жазуу жүзүндөгү билдирүүдөн кийин сен баары бир жакын адамың менен сүйлөшүүң керек, ошондуктан ашыкча тынчсыздануудан алыс болуу үчүн оозеки түрдө түз айткан жакшы.
Бул маселени ким менен талкуулоого болот?
Эгерде апаң менен этек кирдин башталганын талкуулай албасаң, башка варианттар бар. Мүмкүнчүлүккө жараша сен улуу эжеңе, чоң энеңе же таежеңе кайрылсаң болот. Алардын баары бул этаптан өтүшкөн, ошондуктан өз тажрыйбалары жана пайдалуу кеңештери менен бөлүшө алышат.
Курдаштар бири-бирин жакшы түшүнүшөт, ошондуктан көптөгөн кыздар этек кири келип калса, жардам жана кеңеш алуу үчүн этек кири келген курбуларына кайрылууну туура көрүшөт.
Сенин кийинки аракеттериң
Ата-энеңе же башка жакын адамдарыңа айтканда, ушул күндөрү ыңгайлуулук үчүн сага эмне керек экендигин талкуулоо маанилүү. Бул гигиеналык төшөмө же тампон алуу үчүн дүкөнгө баруу, бул күндөрдөгү тамактанууну же иш-аракеттерди талкуулоо болушу мүмкүн. Ошентип, ата-энеңе биринчи этек кир жөнүндө айтуудан коркпо. Бул чоңоюу жолундагы маанилүү кадам жана сен жалгыз эмессиң. Анткени баарыбыз муну баштан өткөрөбүз. Ийгилик!
